zahido rauza-e-rizwan se kaho ishq allah

zāhido rauza-e-rizvāñ se kaho ishq allāh

āshiqo kūcha-e-jānāñ se kaho ishq allāh

jis kī āñkhoñ ne kiyā bazm-e-do-ālam ko ḳharāb

koī us fitna-e-daurāñ se kaho ishq allāh

yaaro dekho jo kahīñ us gul-e-ḳhandāñ kā jamāl

to mire dīda-e-giryāñ se kaho ishq allāh

haiñ jo vo kushta-e-shamshīr nigāh-e-qātil

jā ke un ganj-e-shahīdāñ se kaho ishq allāh

aah ke saath mire siine se nikle hai dhuāñ

ai butāñ mujh dil-e-biryāñ se kaho ishq allāh

yaad meñ us ke ruḳh o zulf kī har aan 'nazīr'

roz-o-shab sumbul-o-raihāñ se kaho ishq allāh

zahido rauza-e-rizwan se kaho ishq allah

aashiqo kucha-e-jaanan se kaho ishq allah

jis ki aankhon ne kiya bazm-e-do-alam ko KHarab

koi us fitna-e-dauran se kaho ishq allah

yaro dekho jo kahin us gul-e-KHandan ka jamal

to mere dida-e-giryan se kaho ishq allah

hain jo wo kushta-e-shamshir nigah-e-qatil

ja ke un ganj-e-shahidan se kaho ishq allah

aah ke sath mere sine se nikle hai dhuan

ai butan mujh dil-e-biryan se kaho ishq allah

yaad mein us ke ruKH o zulf ki har aan 'nazir'

roz-o-shab sumbul-o-raihan se kaho ishq allah