zahir fareb nargis-e-mastana ho gaya

zāhir fareb nargis-e-mastāna ho gayā

kuchh hoshiyār ab dil-e-dīvāna ho gayā

aañsū bhare haiñ aañkh meñ us mast-e-husn kī

labrez kis kī umr kā paimāna ho gayā

iz.hār-e-arz-e-vasl ye bāteñ nahīñ vahāñ

ik harf-e-mudda.ā unheñ afsāna ho gayā

pahle kahāñ thā us dil-e-betāb kā ye haal

kambaḳht us ko dekh ke dīvāna ho gayā

hamdam sharīk koī bure vaqt kā nahīñ

jab dil sā dost ishq meñ begāna ho gayā

ishq-e-butāñ meñ ḳhāna-e-dil kā rahā ye haal

ka.aba banā kabhī kabhī but-ḳhāna ho gayā

har mai-parast jāma-e-ke-khusravī meñ thā

labrez jab sharāb se paimāna ho gayā

kī maiñ ne arz-e-vasl to bole raqīb se

kyā hoshiyār shaḳhs thā dīvāna ho gayā

'mahmūd' hai butoñ se vafā kī tujhe umiid

patthar samajh pe paḌ ga.e dīvāna ho gayā

zahir fareb nargis-e-mastana ho gaya

kuchh hoshiyar ab dil-e-diwana ho gaya

aansu bhare hain aankh mein us mast-e-husn ki

labrez kis ki umr ka paimana ho gaya

izhaar-e-arz-e-wasl ye baaten nahin wahan

ek harf-e-muddaa unhen afsana ho gaya

pahle kahan tha us dil-e-betab ka ye haal

kambaKHt us ko dekh ke diwana ho gaya

hamdam sharik koi bure waqt ka nahin

jab dil sa dost ishq mein begana ho gaya

ishq-e-butan mein KHana-e-dil ka raha ye haal

kaba bana kabhi kabhi but-KHana ho gaya

har mai-parast jama-e-ke-khusrawi mein tha

labrez jab sharab se paimana ho gaya

ki main ne arz-e-wasl to bole raqib se

kya hoshiyar shaKHs tha diwana ho gaya

'mahmud' hai buton se wafa ki tujhe umid

patthar samajh pe paD gae diwana ho gaya