zawiya koi nahin hum ko milane wala

zāviya koī nahīñ ham ko milāne vaalā

vahshat-ābād kā maiñ tū hai zamāne vaalā

phir vo tanhā.ī sā bartāv purāne vaalā

phir koī rūThne vaalā na manāne vaalā

dar pe ta.a.īnāt rahī yuuñ to samā.at merī

lekin aayā hī nahīñ koī bulāne vaalā

kyā pata ḳhvāb meñ us ne mujhe dekhā ki nahīñ

chain se soyā rahā mujh ko jagāne vaalā

raat bhar gūñjī hai ākāsh meñ birhā kī tarañg

raat bhar soyā nahīñ bhairavī gaane vaalā

bas isī kaam meñ mashġhūl hai sote-jagte

kaise bhūlegā bhalā mujh ko bhulāne vaalā

zawiya koi nahin hum ko milane wala

wahshat-abaad ka main tu hai zamane wala

phir wo tanhai sa bartaw purane wala

phir koi ruThne wala na manane wala

dar pe tainat rahi yun to samaat meri

lekin aaya hi nahin koi bulane wala

kya pata KHwab mein us ne mujhe dekha ki nahin

chain se soya raha mujh ko jagane wala

raat bhar gunji hai aakash mein birha ki tarang

raat bhar soya nahin bhairawi gane wala

bas isi kaam mein mashghul hai sote-jagte

kaise bhulega bhala mujh ko bhulane wala