zawiye fikr ke ab aur banao yaro

zāviye fikr ke ab aur banāo yaaro

baat kāġhaz pe na.e Dhañg se laao yaaro

kar diye sard masarrat kī ghaTā ne jazbāt

ruuh ko ġham kī zarā dhuup dikhāo yaaro

jañg aḳhlāq-o-mohabbat se bhī ho saktī hai

apne dushman pe na talvār uThāo yaaro

jis ko har qaum kī tahzīb gavārā kar le

aisā dastūr koī sāmne laao yaaro

intihā nuur kī āñkhoñ meñ na zulmat bhar de

raushnī had se ziyāda na baḌhāo yaaro

merā maqsad hai mulāqāt ġharaz kuchh bhī nahīñ

mujh ko utre hue chehre na dikhāo yaaro

manzileñ zer-e-qadam jald simaT ā.eñgī

jazba-e-'shauq' zarā aur baḌhāo yaaro

zawiye fikr ke ab aur banao yaro

baat kaghaz pe nae Dhang se lao yaro

kar diye sard masarrat ki ghaTa ne jazbaat

ruh ko gham ki zara dhup dikhao yaro

jang aKHlaq-o-mohabbat se bhi ho sakti hai

apne dushman pe na talwar uThao yaro

jis ko har qaum ki tahzib gawara kar le

aisa dastur koi samne lao yaro

intiha nur ki aankhon mein na zulmat bhar de

raushni had se ziyaada na baDhao yaro

mera maqsad hai mulaqat gharaz kuchh bhi nahin

mujh ko utre hue chehre na dikhao yaro

manzilen zer-e-qadam jald simaT aaengi

jazba-e-'shauq' zara aur baDhao yaro