zaban band rahi dil ka muddaa na kaha

zabān band rahī dil kā mudda.ā na kahā

magar nigāh ne us anjuman meñ kyā na kahā

muhīt-e-shauq meñ ham Dūbte ubharte rahe

ḳhudā gavāh kabhī jaur-e-nā-ḳhudā na kahā

sanam-kada hai ki ik mahfil-e-ḳhudā-vandāñ

bahut ḳhafā huā vo but jise ḳhudā na kahā

hazār ḳhizr-numā log rāstoñ meñ mile

hamāre dil ne kisī ko bhī rahnumā na kahā

ye kā.enāt to hai ḳhair mujh se begāna

agar nigāh ne terī bhī āshnā na kahā

zaban band rahi dil ka muddaa na kaha

magar nigah ne us anjuman mein kya na kaha

muhit-e-shauq mein hum Dubte ubharte rahe

KHuda gawah kabhi jaur-e-na-KHuda na kaha

sanam-kada hai ki ek mahfil-e-KHuda-wandan

bahut KHafa hua wo but jise KHuda na kaha

hazar KHizr-numa log raston mein mile

hamare dil ne kisi ko bhi rahnuma na kaha

ye kaenat to hai KHair mujh se begana

agar nigah ne teri bhi aashna na kaha