zaban-e-shama khulti hai na kuchh parwana kahta hai

zabān-e-sham.a khultī hai na kuchh parvāna kahtā hai

magar saarā zamāna bazm kā afsāna kahtā hai

ba-qadr-e-zarf qismat mere saaqī kī ināyat hai

koī paimāna kahtā hai koī mai-ḳhāna kahtā hai

hijāb-e-lāla-o-gul ko mah-o-anjum ke parde ko

vahī kahtā huuñ maiñ jo jalva-e-jānāna kahtā hai

shab ġham meñ jo apne dil se kuchh kahne ko kahtā huuñ

to jis se baḳht so jaa.e vahī afsāna kahtā hai

ḳhudā kahte haiñ kah lene do tum arbāb-e-millat ko

mohabbat to yahī kahtī hai jo dīvāna kahtā hai

yahī īmān-e-mastī hai yahī hai diin mastoñ kā

vahī hotā hai jo kuchh sāqi-e-mai-ḳhāna kahtā hai

yahī 'kaifī' yahī hai be-piye saaqī kā matvālā

qadam mastāna rakhtā hai suḳhan mastāna kahtā hai

zaban-e-shama khulti hai na kuchh parwana kahta hai

magar sara zamana bazm ka afsana kahta hai

ba-qadr-e-zarf qismat mere saqi ki inayat hai

koi paimana kahta hai koi mai-KHana kahta hai

hijab-e-lala-o-gul ko mah-o-anjum ke parde ko

wahi kahta hun main jo jalwa-e-jaanana kahta hai

shab gham mein jo apne dil se kuchh kahne ko kahta hun

to jis se baKHt so jae wahi afsana kahta hai

KHuda kahte hain kah lene do tum arbab-e-millat ko

mohabbat to yahi kahti hai jo diwana kahta hai

yahi iman-e-masti hai yahi hai din maston ka

wahi hota hai jo kuchh saqi-e-mai-KHana kahta hai

yahi 'kaifi' yahi hai be-piye saqi ka matwala

qadam mastana rakhta hai suKHan mastana kahta hai