zaban ne jo bhi kaha arz-e-haal thoDi hai

zabāñ ne jo bhī kahā arz-e-hāl thoḌī hai

tumhāre bin hameñ jiinā muhāl thoḌī hai

jo ik jahāñ ko tahayyur meñ mubtalā kar de

tumhāre jhuuT meñ itnā kamāl thoḌī hai

na jaane kaun sī sāzish rachā.e rahte ho

mirā uruuj tumhārā zavāl thoḌī hai

tire savāl ke badle diyā javāb tujhe

mire javāb meñ koī savāl thoḌī hai

na koī dekh ke ThiTke na uñgliyāñ kaaTe

tire vajūd meñ aisā jamāl thoḌī hai

jo rāh-e-ishq se guzre amar vo kahlā.e

to koī ek hī zinda misāl thoḌī hai

ajiib baat hai har sher tum pe sādiq hai

vagarna dil meñ tumhārā ḳhayāl thoḌī hai

zaban ne jo bhi kaha arz-e-haal thoDi hai

tumhaare bin hamein jina muhaal thoDi hai

jo ek jahan ko tahayyur mein mubtala kar de

tumhaare jhuT mein itna kamal thoDi hai

na jaane kaun si sazish rachae rahte ho

mera uruj tumhaara zawal thoDi hai

tere sawal ke badle diya jawab tujhe

mere jawab mein koi sawal thoDi hai

na koi dekh ke ThiTke na ungliyan kaTe

tere wajud mein aisa jamal thoDi hai

jo rah-e-ishq se guzre amar wo kahlae

to koi ek hi zinda misal thoDi hai

ajib baat hai har sher tum pe sadiq hai

wagarna dil mein tumhaara KHayal thoDi hai