zaban par shikwa-e-dar-o-rasan laya nahin jata

zabāñ par shikva-e-dār-o-rasan laayā nahīñ jaatā

jo apnā haal hai duniyā ko dikhlāyā nahīñ jaatā

baḌī mushkil se miltā hai junūn-e-āshiqī yaaro

jise pā kar ḳhirad kī god meñ jaayā nahīñ jaatā

razā-e-dost meñ kuchh īñ-o-āñ baaqī nahīñ rahtā

mohabbat kā koī farmān Thukrāyā nahīñ jaatā

kisī se zilm-e-be-jā kī shikāyat ho to kyūñkar ho

sitam ye hai ki apnā dil bhī apnāyā nahīñ jaatā

jafā-pesha hasīnoñ se vafā kī kyā tavaqqo hai

magar dil ko kisī unvān samjhāyā nahīñ jaatā

ḳhirad kī baat se aage ta.ayyun se bahut baalā

tasavvur aap kar bhī leñ to vo aayā nahīñ jaatā

hazāroñ baar muusā tuur par jaa.eñ to kyā hāsil

ye vo jalva hai jo har baar dikhlāyā nahīñ jaatā

vahāñ pahuñchā ḳhudā kā ek banda ān-e-vāhid meñ

jahāñ insān kyā insān kā saayā nahīñ jaatā

'nazar' kī ek jumbish par matā-e-hosh luTtī hai

jo is manzil meñ khoyā hai use paayā nahīñ jaatā

zaban par shikwa-e-dar-o-rasan laya nahin jata

jo apna haal hai duniya ko dikhlaya nahin jata

baDi mushkil se milta hai junun-e-ashiqi yaro

jise pa kar KHirad ki god mein jaya nahin jata

raza-e-dost mein kuchh in-o-an baqi nahin rahta

mohabbat ka koi farman Thukraya nahin jata

kisi se zilm-e-be-ja ki shikayat ho to kyunkar ho

sitam ye hai ki apna dil bhi apnaya nahin jata

jafa-pesha hasinon se wafa ki kya tawaqqo hai

magar dil ko kisi unwan samjhaya nahin jata

KHirad ki baat se aage tayyun se bahut baala

tasawwur aap kar bhi len to wo aaya nahin jata

hazaron bar musa tur par jaen to kya hasil

ye wo jalwa hai jo har bar dikhlaya nahin jata

wahan pahuncha KHuda ka ek banda aan-e-wahid mein

jahan insan kya insan ka saya nahin jata

'nazar' ki ek jumbish par mata-e-hosh luTti hai

jo is manzil mein khoya hai use paya nahin jata