zabt-e-girya hunar-e-zinda-dilan Thahrega

zabt-e-girya hunar-e-zinda-dilāñ Thahregā

ik yahī band sar-e-sail-e-ravāñ Thahregā

apne pairoñ meñ hai bāñdhe hue fariyād-e-jaras

dil mirā ek musāfir hai kahāñ Thahregā

kaisā uslūb mirī jaan ki tere aage

lafz Thahregā koī aur na bayāñ Thahregā

kaaT dī 'umr isī chaah meñ rote dhote

kab mire dil ke qarīñ naġhma-e-jāñ Thahregā

lashkar-e-rū-e-sitam diid ke maidāñ meñ to aa

saf-shikan phir mirī āñkhoñ kā javāñ Thahregā

dasht-o-sahrā meñ kabhī gul kā talabgār na ban

varna ye kār-e-junūñ kār-e-jahāñ Thahregā

phir vahī sail-e-tamannā hai vahī dard kī mauj

aise āshob meñ kyā hujra-e-jāñ Thahregā

zabt-e-girya hunar-e-zinda-dilan Thahrega

ek yahi band sar-e-sail-e-rawan Thahrega

apne pairon mein hai bandhe hue fariyaad-e-jaras

dil mera ek musafir hai kahan Thahrega

kaisa uslub meri jaan ki tere aage

lafz Thahrega koi aur na bayan Thahrega

kaT di 'umr isi chah mein rote dhote

kab mere dil ke qarin naghma-e-jaan Thahrega

lashkar-e-ru-e-sitam did ke maidan mein to aa

saf-shikan phir meri aankhon ka jawan Thahrega

dasht-o-sahra mein kabhi gul ka talabgar na ban

warna ye kar-e-junun kar-e-jahan Thahrega

phir wahi sail-e-tamanna hai wahi dard ki mauj

aise aashob mein kya hujra-e-jaan Thahrega