zabt kahta hai dil-e-zar sanbhal jaega

zabt kahtā hai dil-e-zār sañbhal jā.egā

shauq kahtā hai abhī tan se nikal jā.egā

kal kī shab kaT ga.ī jis tarah se ai dard-e-firāq

aaj kā din bhī usī tarah se Tal jā.egā

tum jo bigḌe ho to bigḌā hai muqaddar apnā

tum jo sañbhlo to muqaddar bhī sañbhal jā.egā

bad-gumānī jo unheñ mujh se hai gar duur huī

ek kāñTā sā mire dil se nikal jā.egā

tapish-e-ishq salāmat hai to ik din ai dost

dil tirā mom kī mānind pighal jā.egā

us ko baḳhshegā mirā ishq hayāt-e-jāved

kaun kahtā hai tirā husn ye Dhal jā.egā

dard-e-ulfat kahīñ miTtā hai miTā.e se 'jalīl'

aaj pahlū se gayā aur na kal jā.egā

zabt kahta hai dil-e-zar sanbhal jaega

shauq kahta hai abhi tan se nikal jaega

kal ki shab kaT gai jis tarah se ai dard-e-firaq

aaj ka din bhi usi tarah se Tal jaega

tum jo bigDe ho to bigDa hai muqaddar apna

tum jo sanbhlo to muqaddar bhi sanbhal jaega

bad-gumani jo unhen mujh se hai gar dur hui

ek kanTa sa mere dil se nikal jaega

tapish-e-ishq salamat hai to ek din ai dost

dil tera mom ki manind pighal jaega

us ko baKHshega mera ishq hayat-e-jawed

kaun kahta hai tera husn ye Dhal jaega

dard-e-ulfat kahin miTta hai miTae se 'jalil'

aaj pahlu se gaya aur na kal jaega