zabt ki qaid-e-saKHt ne hum ko riha nahin kiya

zabt kī qaid-e-saḳht ne ham ko rihā nahīñ kiyā

dard pe dard uThā magar shor bapā nahīñ kiyā

duniyā ne kyā nahīñ kiyā ham ne gila nahīñ kiyā

sab se burā.ī lī magar tum ko ḳhafā nahīñ kiyā

jo bhī mutāliba huā uzr zarā nahīñ kiyā

ab to nahīñ kahoge tum va.ada vafā nahīñ kiyā

umr guzar ga.ī tumheñ apnā nahīñ banā sake

sahne ko kyā nahīñ sahā karne ko kyā nahīñ kiyā

haath meñ apnā haath do aao hamārā saath do

us kā bhī dil to thā magar dil kā kahā nahīñ kiyā

maiñ to marīz-e-ishq huuñ merī sehat sehat nahīñ

achchhā mujhe nahīñ kyā tum ne burā nahīñ kiyā

shāyad vo din bhī aa.egā jis din kaheñge ham se vo

'anjum' maiñ sharmsār huuñ terā kahā nahīñ kiyā

zabt ki qaid-e-saKHt ne hum ko riha nahin kiya

dard pe dard uTha magar shor bapa nahin kiya

duniya ne kya nahin kiya hum ne gila nahin kiya

sab se burai li magar tum ko KHafa nahin kiya

jo bhi mutaliba hua uzr zara nahin kiya

ab to nahin kahoge tum wada wafa nahin kiya

umr guzar gai tumhein apna nahin bana sake

sahne ko kya nahin saha karne ko kya nahin kiya

hath mein apna hath do aao hamara sath do

us ka bhi dil to tha magar dil ka kaha nahin kiya

main to mariz-e-ishq hun meri sehat sehat nahin

achchha mujhe nahin kya tum ne bura nahin kiya

shayad wo din bhi aaega jis din kahenge hum se wo

'anjum' main sharmsar hun tera kaha nahin kiya