zahe qismat agar tumko hamara dil pasand aaya

zahe qismat agar tum ko hamārā dil pasand aayā

magar ye daaġh kyuuñ kar ai mah-e-kāmil pasand aayā

kiyā hai qatl lekin dekhiye jaañ kab nikaltī hai

ki un ko raqs-e-betābāna-e-bismil pasand aayā

vo momin bhī hai māñgegā duā sidq-e-tanāsuḳh kī

tire hāthoñ se marnā jis ko ai qātil pasand aayā

na pūchho kab se maiñ shāmil huā huuñ tīra-baḳhtoñ meñ

kisī ke āriz-e-raushan kā jab se til pasand aayā

ye gustāḳhī hai ai 'mahrūm' apnī had se baḌhtā hai

ki tā-hadd-e-zamīn-e-ġhālib-e-mushkil-pasand aayā

zahe qismat agar tum ko hamara dil pasand aaya

magar ye dagh kyun kar ai mah-e-kaamil pasand aaya

kiya hai qatl lekin dekhiye jaan kab nikalti hai

ki un ko raqs-e-betabana-e-bismil pasand aaya

wo momin bhi hai mangega dua sidq-e-tanasuKH ki

tere hathon se marna jis ko ai qatil pasand aaya

na puchho kab se main shamil hua hun tira-baKHton mein

kisi ke aariz-e-raushan ka jab se til pasand aaya

ye gustaKHi hai ai 'mahrum' apni had se baDhta hai

ki ta-hadd-e-zamin-e-ghaalib-e-mushkil-pasand aaya