zahe zinda-dili gham ki gul-afshani nahin jati

zahe zinda-dilī ġham kī gul-afshānī nahīñ jaatī

kuchh aise ashk bhī haiñ jin kī tābānī nahīñ jaatī

talātum-ḳhez maujoñ kā talātum tham gayā lekin

jo barpā hai kināroñ par vo tuġhyānī nahīñ jaatī

mire rahbar mujhe ye kaun-sī manzil pe le aa.e

ki mujh se sūrat-e-manzil bhī pahchānī nahīñ jaatī

hazāroñ āshiyāne phūñk Daale sehn-e-gulshan meñ

magar barq-e-sitam kī sho.ala-afshānī nahīñ jaatī

pilātā hī rahā saaqī hameñ tū zahr ke sāġhar

tire rindoñ kī phir bhī rind-sāmānī nahīñ jaatī

na jaane kyā huā 'armān' asar apnī duāoñ kā

duā.eñ karte haiñ lekin pareshānī nahīñ jaatī

zahe zinda-dili gham ki gul-afshani nahin jati

kuchh aise ashk bhi hain jin ki tabani nahin jati

talatum-KHez maujon ka talatum tham gaya lekin

jo barpa hai kinaron par wo tughyani nahin jati

mere rahbar mujhe ye kaun-si manzil pe le aae

ki mujh se surat-e-manzil bhi pahchani nahin jati

hazaron aashiyane phunk Dale sehn-e-gulshan mein

magar barq-e-sitam ki shoala-afshani nahin jati

pilata hi raha saqi hamein tu zahr ke saghar

tere rindon ki phir bhi rind-samani nahin jati

na jaane kya hua 'arman' asar apni duaon ka

duaen karte hain lekin pareshani nahin jati