zahr ke ghunT pi rahe hain hum

zahr ke ghūñT pī rahe haiñ ham

terī nazroñ meñ jī rahe haiñ ham

ḳhuub hai sozan-e-mizha bhī tirī

dil ke zaḳhmoñ ko sī rahe haiñ ham

ghar to ghar sar diye haiñ ġhurbat meñ

dasht meñ bhī saḳhī rahe haiñ ham

shoḳh hoñ mai-kade hoñ mahfileñ hoñ

har jagah muttaqī rahe haiñ ham

tere kūche kī guftugū hai fuzūl

tere to dil meñ bhī rahe haiñ ham

pesh-e-ḳhidmat haiñ kausar-o-tasnīm

kushta-e-tishnagī rahe haiñ ham

de diye roTiyoñ samet shutur

muflisī meñ ġhanī rahe haiñ ham

nafs ke shar se 'hilm' bach ke raho

muddatoñ se dukhī rahe haiñ ham

zahr ke ghunT pi rahe hain hum

teri nazron mein ji rahe hain hum

KHub hai sozan-e-mizha bhi teri

dil ke zaKHmon ko si rahe hain hum

ghar to ghar sar diye hain ghurbat mein

dasht mein bhi saKHi rahe hain hum

shoKH hon mai-kade hon mahfilen hon

har jagah muttaqi rahe hain hum

tere kuche ki guftugu hai fuzul

tere to dil mein bhi rahe hain hum

pesh-e-KHidmat hain kausar-o-tasnim

kushta-e-tishnagi rahe hain hum

de diye roTiyon samet shutur

muflisi mein ghani rahe hain hum

nafs ke shar se 'hilm' bach ke raho

muddaton se dukhi rahe hain hum