zahr mein bujhti hui bel hai diwar ke sath

zahr meñ bujhtī huī bel hai dīvār ke saath

jaise ik nā.ika baiThī ho gunahgār ke saath

mujh se milnā hai to ye qaid nahīñ mujh ko pasand

har mulāqāt muqayyad rahe itvār ke saath

ek hī vaar meñ marne se kahīñ behtar hai

ek ik sar vo jo kaTtā rahe talvār ke saath

maiñ ne har-gām pe un logoñ ko marte dekhā

vo jo jiite rahe is daur meñ kirdār ke saath

ye jahāñ muflis-o-nādār kā hamdard ho kyuuñ

jis ke har kone pe tahrīr hai zardār ke saath

koī shā.ir mire marne kī ḳhabar laayā hai

ek sah-columnī surḳhī liye aḳhbār ke saath

jashn-e-ḳhūñ-nāb hai maqtal meñ muġhannī se kaho

koī ik raag nayā giit ho malhār ke saath

maiñ bhī is shahr-e-ḳhamoshāñ kā hī sākin huuñ 'umīd'

jis kī har lauh pe tahrīr hai āzār ke saath

zahr mein bujhti hui bel hai diwar ke sath

jaise ek naika baiThi ho gunahgar ke sath

mujh se milna hai to ye qaid nahin mujh ko pasand

har mulaqat muqayyad rahe itwar ke sath

ek hi war mein marne se kahin behtar hai

ek ek sar wo jo kaTta rahe talwar ke sath

main ne har-gam pe un logon ko marte dekha

wo jo jite rahe is daur mein kirdar ke sath

ye jahan muflis-o-nadar ka hamdard ho kyun

jis ke har kone pe tahrir hai zardar ke sath

koi shair mere marne ki KHabar laya hai

ek sah-columni surKHi liye aKHbar ke sath

jashn-e-KHun-nab hai maqtal mein mughanni se kaho

koi ek rag naya git ho malhaar ke sath

main bhi is shahr-e-KHamoshan ka hi sakin hun 'umid'

jis ki har lauh pe tahrir hai aazar ke sath