zahr pita hai shab-o-roz dua deta hai

zahr piitā hai shab-o-roz duā detā hai

paikar-e-ḳhāk hī jannat kā patā detā hai

gosha-e-zehn meñ jaltā hai ra.ūnat kā charāġh

dil kī bastī meñ vahī aag lagā detā hai

sāzisheñ jab bhī ḳhayāloñ meñ jagah paatī haiñ

aadmī TuuT ke miltā hai daġhā detā hai

kar ke ehsān mirī zaat pe hañsne vaalo

chehra insān kī auqāt batā detā hai

jin kī azmat pe farishtoñ ne qadam chuum liyā

haq-navā.ī kā sila un ko ḳhudā detā hai

mere ehsās ke gulshan meñ bikharne kā ḳhayāl

jab bhī aatā hai mirī niiñd uḌā detā hai

ghar kī dahlīz pe vo raat ga.e pichhle pahar

jaane kis haal meñ 'nashtar' ko sadā detā hai

zahr pita hai shab-o-roz dua deta hai

paikar-e-KHak hi jannat ka pata deta hai

gosha-e-zehn mein jalta hai raunat ka charagh

dil ki basti mein wahi aag laga deta hai

sazishen jab bhi KHayalon mein jagah pati hain

aadmi TuT ke milta hai dagha deta hai

kar ke ehsan meri zat pe hansne walo

chehra insan ki auqat bata deta hai

jin ki azmat pe farishton ne qadam chum liya

haq-nawai ka sila un ko KHuda deta hai

mere ehsas ke gulshan mein bikharne ka KHayal

jab bhi aata hai meri nind uDa deta hai

ghar ki dahliz pe wo raat gae pichhle pahar

jaane kis haal mein 'nashtar' ko sada deta hai