zahrāb-e-hayāt pī rahā huuñ
hairat hai ki phir bhī jī rahā huuñ
kis kis kī zabān band kartā
ḳhud apne hī hoñT sī rahā huuñ
tālib hai farishtagī kī duniyā
aur maiñ faqat aadmī rahā huuñ
kyā kam hai ye sāneha ki maiñ hī
un āñkhoñ kī kirkirī rahā huuñ
sūraj se laḌāne vaalā āñkheñ
maiñ hī sūraj-mukhī rahā huuñ
rūdād-e-hayāt hai bas itnī
pāmāl-e-sitamgarī rahā huuñ
apnī hī nigah meñ 'nāvak' ab tak
ye sach hai ki ajnabī rahā huuñ
zahrab-e-hayat pi raha hun
hairat hai ki phir bhi ji raha hun
kis kis ki zaban band karta
KHud apne hi honT si raha hun
talib hai farishtagi ki duniya
aur main faqat aadmi raha hun
kya kam hai ye saneha ki main hi
un aankhon ki kirkiri raha hun
suraj se laDane wala aankhen
main hi suraj-mukhi raha hun
rudad-e-hayat hai bas itni
pamal-e-sitamgari raha hun
apni hi nigah mein 'nawak' ab tak
ye sach hai ki ajnabi raha hun
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
