zaKHm hai aur namak fishani hai

zaḳhm hai aur namak fishānī hai

dostī dushmanī-e-jānī hai

naqsh-e-avval hai chehra-e-yūsuf

aur tirā chehra naqsh-e-sānī hai

tere kūche se māne-e-raftār

ham ko apnī hī nā-tavānī hai

husn meñ chehra us gul-e-tar kā

naqsh-e-rañgīn-e-kilk-e-mānī hai

us pe parvāne go hujūm kareñ

sham.a kī vo hī kam-zabānī hai

is sarā meñ sabhī musāfir haiñ

ya.anī jo hai so kārvānī hai

aalam us kī safā kā mujh se na pūchh

nazm meñ terī jo ravānī hai

'mus.hafī' sher-e-sāda kahne meñ

vaqt kā apne to fuġhānī hai

zaKHm hai aur namak fishani hai

dosti dushmani-e-jaani hai

naqsh-e-awwal hai chehra-e-yusuf

aur tera chehra naqsh-e-sani hai

tere kuche se mane-e-raftar

hum ko apni hi na-tawani hai

husn mein chehra us gul-e-tar ka

naqsh-e-rangin-e-kilk-e-mani hai

us pe parwane go hujum karen

shama ki wo hi kam-zabani hai

is sara mein sabhi musafir hain

yani jo hai so karwani hai

aalam us ki safa ka mujh se na puchh

nazm mein teri jo rawani hai

'mushafi' sher-e-sada kahne mein

waqt ka apne to fughani hai