zaKHm khulte hain to ek dard-e-nihan khinchta hai

zaḳhm khulte haiñ to ik dard-e-nihāñ khīñchtā hai

aisā lagtā hai koī jism se jaañ khīñchtā hai

hañste chehroñ se ayaañ hote haiñ ġham ke manzar

mere jaisī koī tasvīr kahāñ khīñchtā hai

jiinā chāhūñ bhī to jiine nahīñ detī duniyā

marnā chāhūñ to mujhe saarā jahāñ khīñchtā hai

jhuuT kahtā huuñ to kartā hai pazīrā.ī mirī

sach batātā huuñ to vo shaḳhs zabāñ khīñchtā hai

pahle maiñ khīñchtā rahtā thā dhuāñ cigarette kā

aur ab mujh ko ye cigarette kā dhuāñ khīñchtā hai

is tarah chaltā chalā jaatā huuñ us kī jānib

jaise pyāse kisī insāñ ko kuaañ khīñchtā hai

zaKHm khulte hain to ek dard-e-nihan khinchta hai

aisa lagta hai koi jism se jaan khinchta hai

hanste chehron se ayan hote hain gham ke manzar

mere jaisi koi taswir kahan khinchta hai

jina chahun bhi to jine nahin deti duniya

marna chahun to mujhe sara jahan khinchta hai

jhuT kahta hun to karta hai pazirai meri

sach batata hun to wo shaKHs zaban khinchta hai

pahle main khinchta rahta tha dhuan cigarette ka

aur ab mujh ko ye cigarette ka dhuan khinchta hai

is tarah chalta chala jata hun us ki jaanib

jaise pyase kisi insan ko kuan khinchta hai