zaKHm ko phul banane ka hunar jaante hain

zaḳhm ko phuul banāne kā hunar jānte haiñ

ham bhī fankār haiñ ye ahl-e-nazar jānte haiñ

ham ki ġhāfil nahīñ ahvāl se tere jānāñ

nok-e-mizhgāñ pe hai kyoñ sho’la-e-tar jānte haiñ

ek hī pal meñ badal detā hai chehre kā nizām

mausam-e-ġham hai baḌā zūd-asar jānte haiñ

merī hassās tabī'at hai bahut hī hassās

merī fitrat ko mire dīda-e-tar jānte haiñ

ab to manzil pe pahuñchne kā bhī imkān nahīñ

chand sāñseñ haiñ faqat zād-e-safar jānte haiñ

kyoñ mire ġham meñ nahīñ hote vo shāmil ki 'ḳhatīb'

mere ġham ko mire ahbāb agar jānte haiñ

zaKHm ko phul banane ka hunar jaante hain

hum bhi fankar hain ye ahl-e-nazar jaante hain

hum ki ghafil nahin ahwal se tere jaanan

nok-e-mizhgan pe hai kyon sho’la-e-tar jaante hain

ek hi pal mein badal deta hai chehre ka nizam

mausam-e-gham hai baDa zud-asar jaante hain

meri hassas tabi'at hai bahut hi hassas

meri fitrat ko mere dida-e-tar jaante hain

ab to manzil pe pahunchne ka bhi imkan nahin

chand sansen hain faqat zad-e-safar jaante hain

kyon mere gham mein nahin hote wo shamil ki 'KHatib'

mere gham ko mere ahbab agar jaante hain