zaKHm ko zaKHm nahin jism ki zinat samjho

zaḳhm ko zaḳhm nahīñ jism kī zīnat samjho

zinda dil ho to har ik ranj ko rāhat samjho

sādgī itnī bhī achchhī nahīñ nādāñ na bano

pyaar ko pyaar adāvat ko adāvat samjho

shāḳh-e-gul se mujhe tashbīh na do zid na karo

aag meñ jaltī huī koī imārat samjho

jald-bāzī meñ koī raa.e na qaa.em kar lo

ġhaur se ḳhat ko paḌho ḳhat kī ibārat samjho

ek bedār nafas shahr meñ zinda hai abhī

qadr-dārān-e-junūñ ye bhī ġhanīmat samjho

ḳhud-numā.ī kā zarīya huuñ mirī qadr karo

aa.ina huuñ mujhe chehroñ kī amānat samjho

talḳh-go ho ke bhī har haal meñ muḳhlis huuñ 'azīz'

merī aadat ko na dekho mirī fitrat samjho

zaKHm ko zaKHm nahin jism ki zinat samjho

zinda dil ho to har ek ranj ko rahat samjho

sadgi itni bhi achchhi nahin nadan na bano

pyar ko pyar adawat ko adawat samjho

shaKH-e-gul se mujhe tashbih na do zid na karo

aag mein jalti hui koi imarat samjho

jald-bazi mein koi rae na qaem kar lo

ghaur se KHat ko paDho KHat ki ibarat samjho

ek bedar nafas shahr mein zinda hai abhi

qadr-daran-e-junun ye bhi ghanimat samjho

KHud-numai ka zariya hun meri qadr karo

aaina hun mujhe chehron ki amanat samjho

talKH-go ho ke bhi har haal mein muKHlis hun 'aziz'

meri aadat ko na dekho meri fitrat samjho