zaKHm kuchh aise mere qalb-o-jigar ne pae

zaḳhm kuchh aise mire qalb-o-jigar ne paa.e

umr bhar jo kisī unvān na bharne paa.e

ham ne ashkoñ ke charāġhoñ se sajā liiñ palkeñ

ki tire dard kī bārāt guzarne paa.e

us se kyā pūchhte ho falsafa-e-maut-o-hayāt

ki jo zinda bhī rahe aur na marne paa.e

is liye kam-nazarī kā bhī sitam sahnā paḌā

tujh pe mahfil meñ koī naam na dharne paa.e

pās-e-ādāb-e-vafā thā ki shikasta-pā.ī

be-ḳhudī meñ bhī na ham had se guzarne paa.e

apne jazbāt ke biphre hue tūfāñ meñ 'razā'

is tarah Duube ki phir ham na ubharne paa.e

zaKHm kuchh aise mere qalb-o-jigar ne pae

umr bhar jo kisi unwan na bharne pae

hum ne ashkon ke charaghon se saja lin palken

ki tere dard ki baraat guzarne pae

us se kya puchhte ho falsafa-e-maut-o-hayat

ki jo zinda bhi rahe aur na marne pae

is liye kam-nazari ka bhi sitam sahna paDa

tujh pe mahfil mein koi nam na dharne pae

pas-e-adab-e-wafa tha ki shikasta-pai

be-KHudi mein bhi na hum had se guzarne pae

apne jazbaat ke biphre hue tufan mein 'raza'

is tarah Dube ki phir hum na ubharne pae