zaKHm se riste lahu ko surKH pani kar gaya

zaḳhm se riste lahū ko surḳh paanī kar gayā

jab bhī vo aayā haqīqat ko kahānī kar gayā

āsmāñ se ik samundar kī tarah utrā thā vo

vaqf har sahrā-nashīñ ke zindagānī kar gayā

maiñ tumhārā aa.ina huuñ aks apnā dekh lo

ḳhatm is jumle pe saarī lan-tarānī kar gayā

chāñd ke ujle badan par ek kaalā sā nishān

zindagī ke roz-o-shab kī tarjumānī kar gayā

us ke andāz-e-takallum meñ ye kaisā soz thā

pattharoñ ke jism ko bhī paanī paanī kar gayā

maslahat jaane use yā samjheñ insānī huqūq

ik sitamgar be-tavaqqo mehrbānī kar gayā

'shahzar' apne jism par kambal lapeTe ik faqīr

saarī duniyā par sunā hai hukmrānī kar gayā

zaKHm se riste lahu ko surKH pani kar gaya

jab bhi wo aaya haqiqat ko kahani kar gaya

aasman se ek samundar ki tarah utra tha wo

waqf har sahra-nashin ke zindagani kar gaya

main tumhaara aaina hun aks apna dekh lo

KHatm is jumle pe sari lan-tarani kar gaya

chand ke ujle badan par ek kala sa nishan

zindagi ke roz-o-shab ki tarjumani kar gaya

us ke andaz-e-takallum mein ye kaisa soz tha

pattharon ke jism ko bhi pani pani kar gaya

maslahat jaane use ya samjhen insani huquq

ek sitamgar be-tawaqqo mehrbani kar gaya

'shahzar' apne jism par kambal lapeTe ek faqir

sari duniya par suna hai hukmrani kar gaya