zaKHm taza tha to gahrai ka andaza na tha

zaḳhm taaza thā to gahrā.ī kā andāza na thā

ab gumāñ hotā hai us ko chāhnā achchhā na thā

maiñ ki dast-e-hāl meñ thā haal se bhī be-ḳhabar

pusht par maazī kī yādeñ sāmne fardā na thā

vo mirī nas nas meñ kaise dard ban kar rah gayā

mere us ke darmiyāñ aisā koī rishta na thā

chāñd sā ma.asūm chehra aa.ina sā rū-ba-rū

ruuh kī sarshāriyāñ thiiñ jism ālūda na thā

dekhte hī dekhte ye rut bhī kyā zardā ga.ī

sabz mausam thā to sahrā meñ bhī sannāTā na thā

jab khulīñ āñkheñ to har pahchān raushan hai 'shamīm'

maiñ ne ye jaanā ki is ko aaj tak jaanā na thā

zaKHm taza tha to gahrai ka andaza na tha

ab guman hota hai us ko chahna achchha na tha

main ki dast-e-haal mein tha haal se bhi be-KHabar

pusht par mazi ki yaaden samne farda na tha

wo meri nas nas mein kaise dard ban kar rah gaya

mere us ke darmiyan aisa koi rishta na tha

chand sa masum chehra aaina sa ru-ba-ru

ruh ki sarshaariyan thin jism aaluda na tha

dekhte hi dekhte ye rut bhi kya zarda gai

sabz mausam tha to sahra mein bhi sannaTa na tha

jab khulin aankhen to har pahchan raushan hai 'shamim'

main ne ye jaana ki is ko aaj tak jaana na tha