zamana dekhta hai hans ke chashm-e-KHun-fishan meri

zamāna dekhtā hai hans ke chashm-e-ḳhūñ-fishāñ merī

magar maiñ ḳhush huuñ un kī dāstāñ hai aur zabāñ merī

akelā huuñ bharī duniyā meñ maiñ kis ko kahūñ apnā

koī hotā to kar detā mukammal dāstāñ merī

guzartā aa rahā huuñ jaane meñ kin kin maqāmoñ se

zamīñ ke ba.ad aayā rahguzar meñ āsmāñ merī

maiñ yārab ḳhaak kā putlā sahī lekin ye kyā kam hai

huī hai muntaḳhab hastī barā.e imtihāñ merī

fanā kī manziloñ par ḳhatm haiñ rāheñ anāsir kī

yahī ab dekhnā hai ruuh jaatī hai kahāñ merī

na jaane silsila jaatā kahāñ tak jism-e-ḳhākī kā

ḳhudā kā shukr hai had ban ga.e kaun-o-makāñ merī

zarā ai azm-e-dil ruḳh pher tūfāñ kī havāoñ ke

sū-e-girdāb kashtī le chalī mauj-e-ravāñ merī

zabāñ par le to ā.ūñgā magar dil thāmnā hogā

mujhe ma.alūm hai rūdād-e-dil hai lā-bayāñ merī

kaḌak kar bijliyāñ rah jā.eñgī chhaT jā.eñge bādal

rahegā zindagī ban kar sukūn-e-āshiyāñ merī

'falak' maiñ sar-zamīn-e-'dāġh'-o-'ġhālib' kā huuñ ik zarra

vatan hai shahr-e-dehlī zindagī urdu zabāñ merī

zamana dekhta hai hans ke chashm-e-KHun-fishan meri

magar main KHush hun un ki dastan hai aur zaban meri

akela hun bhari duniya mein main kis ko kahun apna

koi hota to kar deta mukammal dastan meri

guzarta aa raha hun jaane mein kin kin maqamon se

zamin ke baad aaya rahguzar mein aasman meri

main yarab KHak ka putla sahi lekin ye kya kam hai

hui hai muntaKHab hasti barae imtihan meri

fana ki manzilon par KHatm hain rahen anasir ki

yahi ab dekhna hai ruh jati hai kahan meri

na jaane silsila jata kahan tak jism-e-KHaki ka

KHuda ka shukr hai had ban gae kaun-o-makan meri

zara ai azm-e-dil ruKH pher tufan ki hawaon ke

su-e-girdab kashti le chali mauj-e-rawan meri

zaban par le to aaunga magar dil thamna hoga

mujhe malum hai rudad-e-dil hai la-bayan meri

kaDak kar bijliyan rah jaengi chhaT jaenge baadal

rahega zindagi ban kar sukun-e-ashiyan meri

'falak' main sar-zamin-e-'dagh'-o-'ghaalib' ka hun ek zarra

watan hai shahr-e-dehli zindagi urdu zaban meri