zamane ho gae tere karam ki aas lagi

zamāne ho ga.e tere karam kī aas lagī

qarīb-e-mai-kada sahrā sī mujh ko pyaas lagī

lahū rulāte haiñ mujh ko suhāvne manzar

chaTaktī chāñdnī tere binā udaas lagī

na us meñ mai hai na paanī to pyaas kaise bujhe

ye zindagī mujhe TuuTā huā gilās lagī

ye garm garm se aañsū batā rahe haiñ yahī

zarūr aag kahīñ dil ke ās-pās lagī

yahāñ to koī bhī mālik nahīñ mire sāhab

tamām ḳhalq mujhe ḳhvāhishoñ kī daas lagī

jahez naam hī se rañg uḌ gayā us kā

ġharīb baap kī beTī jahāñ-shanās lagī

kaḌaktī dhuup meñ chal to paḌī dulhan 'hasrat'

qadam qadam pe use rāste meñ pyaas lagī

zamane ho gae tere karam ki aas lagi

qarib-e-mai-kada sahra si mujh ko pyas lagi

lahu rulate hain mujh ko suhawne manzar

chaTakti chandni tere bina udas lagi

na us mein mai hai na pani to pyas kaise bujhe

ye zindagi mujhe TuTa hua gilas lagi

ye garm garm se aansu bata rahe hain yahi

zarur aag kahin dil ke aas-pas lagi

yahan to koi bhi malik nahin mere sahab

tamam KHalq mujhe KHwahishon ki das lagi

jahez nam hi se rang uD gaya us ka

gharib bap ki beTi jahan-shanas lagi

kaDakti dhup mein chal to paDi dulhan 'hasrat'

qadam qadam pe use raste mein pyas lagi