zamane ki baaton se be-dil nahin hun

zamāne kī bātoñ se be-dil nahīñ huuñ

jo maujoñ se TuuTe vo sāhil nahīñ huuñ

taḌaptā huuñ apnī haqīqat samajh kar

qatīl-e-mashiyyat huuñ bismil nahīñ huuñ

hai ḳhāk-e-madīna se bhī mujh ko nisbat

jo mil jaa.e paanī meñ vo gil nahīñ huuñ

tujhe māñgtā huuñ tujhe dene vaale

bhikārī nahīñ huuñ maiñ saa.il nahīñ huuñ

mire haath meñ apnā dast-e-saḳhā de

ye kah de saḳhāvat ke qābil nahīñ huuñ

maiñ apnī haqīqat samajhtā huuñ ai dil

maiñ apnī haqīqat se ġhāfil nahīñ huuñ

ye kah kar nikal aaya zindāñ se bāhar

maiñ pāband-e-tauq-o-salāsil nahīñ huuñ

vo de azm-e-mohkam mujhe dene vaale

pukār uTThe mushkil ki mushkil nahīñ huuñ

'girāmī' bhikārī huuñ ḳhvāja ke dar kā

kisī ġhair ke dar kā saa.il nahīñ huuñ

zamane ki baaton se be-dil nahin hun

jo maujon se TuTe wo sahil nahin hun

taDapta hun apni haqiqat samajh kar

qatil-e-mashiyyat hun bismil nahin hun

hai KHak-e-madina se bhi mujh ko nisbat

jo mil jae pani mein wo gil nahin hun

tujhe mangta hun tujhe dene wale

bhikari nahin hun main sail nahin hun

mere hath mein apna dast-e-saKHa de

ye kah de saKHawat ke qabil nahin hun

main apni haqiqat samajhta hun ai dil

main apni haqiqat se ghafil nahin hun

ye kah kar nikal aaya zindan se bahar

main paband-e-tauq-o-salasil nahin hun

wo de azm-e-mohkam mujhe dene wale

pukar uTThe mushkil ki mushkil nahin hun

'girami' bhikari hun KHwaja ke dar ka

kisi ghair ke dar ka sail nahin hun