zamane mein gham-e-ulfat ke diwane bahut se hain

zamāne meñ ġham-e-ulfat ke dīvāne bahut se haiñ

sharāb-e-aish-o-ishrat ke bhī mastāne bahut se haiñ

hamāre ġham se nā-vāqif ka.ī ahbāb haiñ ab tak

hai ye hairat ki ḳhud apnoñ meñ begāne bahut se haiñ

mirī dīvāngī ne mujh ko pahuñchāyā vahāñ āḳhir

jahāñ dīvāne kam haiñ aur farzāne bahut se haiñ

mohabbat kā bhī kyā iqbāl hai vahshat kī duniyā meñ

hai ābādī bahut kam aur vīrāne bahut se haiñ

zarā baḌh kar to dekh āḳhir ye dastak dar pe dī kis ne

dil-e-majbūr tere jaane pahchāne bahut se haiñ

hai ḳhud-bīnī kī hasrat to chale aao mire dil meñ

ye vo gosha hai jis meñ ā.ina-ḳhāne bahut se haiñ

piye jaatā huuñ saaqī terī kaif-āvar nigāhoñ se

agarche mai-kade meñ tere paimāne bahut se haiñ

hazāroñ lākhoñ nazrānoñ kā nazrāna hai sirf ik dil

tujhe dene ke qābil yuuñ to nazrāne bahut se haiñ

tire kūcha meñ jiinā hai tire kūcha meñ marnā hai

uḌānī hī agar ho ḳhaak vīrāne bahut se haiñ

charāġh-e-ma.arifat ko ab na karnā chāhiye raushan

bahut kam ḳhaas haiñ aur aam parvāne bahut se haiñ

haram jaane se pahle hai butoñ kā toḌnā lāzim

tumhāre dil meñ bhī 'akmal' sanam-ḳhāne bahut se haiñ

zamane mein gham-e-ulfat ke diwane bahut se hain

sharab-e-aish-o-ishrat ke bhi mastane bahut se hain

hamare gham se na-waqif kai ahbab hain ab tak

hai ye hairat ki KHud apnon mein begane bahut se hain

meri diwangi ne mujh ko pahunchaya wahan aaKHir

jahan diwane kam hain aur farzane bahut se hain

mohabbat ka bhi kya iqbaal hai wahshat ki duniya mein

hai aabaadi bahut kam aur virane bahut se hain

zara baDh kar to dekh aaKHir ye dastak dar pe di kis ne

dil-e-majbur tere jaane pahchane bahut se hain

hai KHud-bini ki hasrat to chale aao mere dil mein

ye wo gosha hai jis mein aaina-KHane bahut se hain

piye jata hun saqi teri kaif-awar nigahon se

agarche mai-kade mein tere paimane bahut se hain

hazaron lakhon nazranon ka nazrana hai sirf ek dil

tujhe dene ke qabil yun to nazrane bahut se hain

tere kucha mein jina hai tere kucha mein marna hai

uDani hi agar ho KHak virane bahut se hain

charagh-e-marifat ko ab na karna chahiye raushan

bahut kam KHas hain aur aam parwane bahut se hain

haram jaane se pahle hai buton ka toDna lazim

tumhaare dil mein bhi 'akmal' sanam-KHane bahut se hain