zamin din-raat jal rahi hai

zamīn din-rāt jal rahī hai

tabhī to sho.ale ugal rahī hai

kalām karte haiñ log ḳhud se

bhaḌās dil kī nikal rahī hai

abhī se kyā faisla karūñ maiñ

abhī to duniyā badal rahī hai

qadam baḌhāne kā hai natīja

ki barf ab kuchh pighal rahī hai

vahāñ to mausam hai bārishoñ kā

nadī yahāñ kyuuñ ubal rahī hai

tum apnā shosha uThā.e rakkho

mirī tabī.at bahal rahī hai

jagī hai koī to aas mujh meñ

jo niiñd ḳhvāboñ meñ Dhal rahī hai

haTā jo malba to maiñ ne jaanā

abhī mirī saañs chal rahī hai

nafas nafas jī rahā huuñ 'rāhat'

gaḌhī gaḌhī maut Tal rahī hai

zamin din-raat jal rahi hai

tabhi to shoale ugal rahi hai

kalam karte hain log KHud se

bhaDas dil ki nikal rahi hai

abhi se kya faisla karun main

abhi to duniya badal rahi hai

qadam baDhane ka hai natija

ki barf ab kuchh pighal rahi hai

wahan to mausam hai barishon ka

nadi yahan kyun ubal rahi hai

tum apna shosha uThae rakkho

meri tabiat bahal rahi hai

jagi hai koi to aas mujh mein

jo nind KHwabon mein Dhal rahi hai

haTa jo malba to main ne jaana

abhi meri sans chal rahi hai

nafas nafas ji raha hun 'rahat'

gaDhi gaDhi maut Tal rahi hai