zamin-e-hijr mein gardan talak gaDa hua hun

zamīn-e-hijr meñ gardan talak gaḌā huā huuñ

maiñ tujh ko haar ke ab soch meñ paḌā huā huuñ

har ek samt hai shorish balā kī vahshat hai

maiñ dasht-zād huuñ aur shahr meñ khaḌā huā huuñ

ḳhudā kā shukr ki zebā.ishoñ kā huuñ baa.is

ye aur baat ki pāzeb meñ jaḌā huā huuñ

ye ishq maut ke asbāb paidā kartā hai

maiñ tiis saal se is baat par aḌā huā huuñ

kiyā thā aap ne sarvat kā zikr ḳhair jahāñ

maiñ ehtirām meñ ab tak vahīñ khaḌā huā huuñ

ḳhudā kare ki tujhe bandagī pasand aa.e

maiñ ḳhaak ho ke tirī raah meñ paḌā huā huuñ

maiñ qahqahoñ ke qabīle kā aadmī thā magar

ajiib hai ki gale dasht ke paḌā huā huuñ

batā rahe the ye 'faisal' imaam ishq mujhe

maiñ intizār-e-musalsal se chiḌā huā huuñ

zamin-e-hijr mein gardan talak gaDa hua hun

main tujh ko haar ke ab soch mein paDa hua hun

har ek samt hai shorish bala ki wahshat hai

main dasht-zad hun aur shahr mein khaDa hua hun

KHuda ka shukr ki zebaishon ka hun bais

ye aur baat ki pazeb mein jaDa hua hun

ye ishq maut ke asbab paida karta hai

main tis sal se is baat par aDa hua hun

kiya tha aap ne sarwat ka zikr KHair jahan

main ehtiram mein ab tak wahin khaDa hua hun

KHuda kare ki tujhe bandagi pasand aae

main KHak ho ke teri rah mein paDa hua hun

main qahqahon ke qabile ka aadmi tha magar

ajib hai ki gale dasht ke paDa hua hun

bata rahe the ye 'faisal' imam ishq mujhe

main intizar-e-musalsal se chiDa hua hun