zamin ke dosh pe ek munfarid kitab hun main

zamīñ ke dosh pe ik munfarid kitāb huuñ maiñ

ye aur baat hai be-nām intisāb huuñ maiñ

kabhī ye vahm ki ḳhāliq-numā hai merā vajūd

kabhī ḳhayāl ki dhokā huuñ ik sarāb huuñ maiñ

mirā qusūr jo merī niyāz-mandī hai

to is ke baad haqīqat meñ lā-javāb huuñ maiñ

haiñ qadr-dāñ ke tajassus meñ mere gauhar-e-fikr

samundaroñ kī tarah mahv-e-pech-o-tāb huuñ maiñ

jagāyā mahshar-e-hastī ne jab to aisā lagā

kabhī jo dekhā thā maiñ ne vo ek ḳhvāb huuñ maiñ

paḌho ki haal kī tārīḳh hai raqam 'hasrat'

jalī hurūf meñ rūdād-e-inqalāb huuñ maiñ

zamin ke dosh pe ek munfarid kitab hun main

ye aur baat hai be-nam intisab hun main

kabhi ye wahm ki KHaliq-numa hai mera wajud

kabhi KHayal ki dhoka hun ek sarab hun main

mera qusur jo meri niyaz-mandi hai

to is ke baad haqiqat mein la-jawab hun main

hain qadr-dan ke tajassus mein mere gauhar-e-fikr

samundaron ki tarah mahw-e-pech-o-tab hun main

jagaya mahshar-e-hasti ne jab to aisa laga

kabhi jo dekha tha main ne wo ek KHwab hun main

paDho ki haal ki tariKH hai raqam 'hasrat'

jali huruf mein rudad-e-inqalab hun main