zamin KHatm hui sar par aasman na raha

zamīn ḳhatm huī sar par āsmāñ na rahā

isī ke saath koī ḳhauf-e-imtihāñ na rahā

hamāre ishq kā koī gavāh zinda nahīñ

azāb-e-hijr thā ab vo bhī darmiyāñ na rahā

tamām-rāt sitāre hamīñ ko dekhte the

tilism-e-zāt se nikle to ye jahāñ na rahā

fasīl-e-shahr pe shab-zinda-dār rahte the

hujūm-e-shahr meñ aisā koī javāñ na rahā

ye zindagī hai to ham zindagī se baaz aa.e

vo jaan kyā ki jahāñ jaan kā ziyāñ na rahā

tamām lafz haiñ tafhīm-e-nau pe āmāda

qayāmatoñ se guzarnā bhī nā-gahāñ na rahā

bas ik salīqa-e-tajsīm ḳhvāb thā magar ab

sivā.e sīna-e-sad-chāk kuchh nishāñ na rahā

miyān-e-gardish-e-aflāk tū bhī ḳhush ho jā

malāl ham ko bhī ai sa.ī-e-rā.egāñ na rahā

ḳharāb-o-ḳhasta-o-āsūdagān-e-manzil bhī

naved-e-jashn ki 'haqqī' kā kārvāñ na rahā

zamin KHatm hui sar par aasman na raha

isi ke sath koi KHauf-e-imtihan na raha

hamare ishq ka koi gawah zinda nahin

azab-e-hijr tha ab wo bhi darmiyan na raha

tamam-raat sitare hamin ko dekhte the

tilism-e-zat se nikle to ye jahan na raha

fasil-e-shahr pe shab-zinda-dar rahte the

hujum-e-shahr mein aisa koi jawan na raha

ye zindagi hai to hum zindagi se baz aae

wo jaan kya ki jahan jaan ka ziyan na raha

tamam lafz hain tafhim-e-nau pe aamada

qayamaton se guzarna bhi na-gahan na raha

bas ek saliqa-e-tajsim KHwab tha magar ab

siwae sina-e-sad-chaak kuchh nishan na raha

miyan-e-gardish-e-aflak tu bhi KHush ho ja

malal hum ko bhi ai sai-e-raegan na raha

KHarab-o-KHasta-o-asudagan-e-manzil bhi

nawed-e-jashn ki 'haqqi' ka karwan na raha