zamin mai-kada-e-arsh-e-barin malum hoti hai

zamīn mai-kada-e-arsh-e-barīñ ma.alūm hotī hai

ye ḳhisht-e-ḳhum farishte kī jabīñ ma.alūm hotī hai

parī uḌne meñ zulf-e-ambarīñ ma.alūm hotī hai

ye kaalī shakl bhī kitnī hasīñ ma.alūm hotī hai

mirī hasrat tabassum-āfrīñ ma.alūm hotī hai

chhupī tere tabassum meñ nahīñ ma.alūm hotī hai

shafaq kah le koī chāhe shafaq-gūñ āsmāñ kah le

hameñ to kū-e-qātil kī zamīñ ma.alūm hotī hai

chalī hai teġh to kis naaz se tham tham ke ruk ruk kar

ye kuchh un se ziyāda nāznīñ ma.alūm hotī hai

are saaqī zarā merī sharāb-e-talḳh to laanā

mai-e-kausar to bilkul añgbīñ ma.alūm hotī hai

chhupī hai vo nigāh-e-shoḳh bhī mizhgāñ ke saa.e meñ

chhurī bhī aaj zer-e-āstīñ ma.alūm hotī hai

ubhāro to zarā shāyad mirā Duubā huā dil ho

koī shai bahr-e-ġham meñ tah-nashīñ ma.alūm hotī hai

nahīñ ab dard-e-dil lekin abhī tak hai asar kuchh kuchh

chamak rah rah ke pahlū meñ kahīñ ma.alūm hotī hai

asar Daalā hai hasrat ne nigāh-e-shauq par kitnā

ki vo ab bhī nigāh vāpsīñ ma.alūm hotī hai

ye ai sayyād rah rah kar chamaktī hai kahāñ bijlī

jahāñ merā nasheman thā vahīñ ma.alūm hotī hai

lapak us kī chamak us kī vahī dam-ḳham vahī aalam

ye bijlī koī āh-e-ātishīñ ma.alūm hotī hai

'riyāz' aisī mire dil se lagī hai jām-e-kausar kī

mai-e-añgūr ab achchhī nahīñ ma.alūm hotī hai

zamin mai-kada-e-arsh-e-barin malum hoti hai

ye KHisht-e-KHum farishte ki jabin malum hoti hai

pari uDne mein zulf-e-ambarin malum hoti hai

ye kali shakl bhi kitni hasin malum hoti hai

meri hasrat tabassum-afrin malum hoti hai

chhupi tere tabassum mein nahin malum hoti hai

shafaq kah le koi chahe shafaq-gun aasman kah le

hamein to ku-e-qatil ki zamin malum hoti hai

chali hai tegh to kis naz se tham tham ke ruk ruk kar

ye kuchh un se ziyaada naznin malum hoti hai

are saqi zara meri sharab-e-talKH to lana

mai-e-kausar to bilkul angbin malum hoti hai

chhupi hai wo nigah-e-shoKH bhi mizhgan ke sae mein

chhuri bhi aaj zer-e-astin malum hoti hai

ubhaaro to zara shayad mera Duba hua dil ho

koi shai bahr-e-gham mein tah-nashin malum hoti hai

nahin ab dard-e-dil lekin abhi tak hai asar kuchh kuchh

chamak rah rah ke pahlu mein kahin malum hoti hai

asar Dala hai hasrat ne nigah-e-shauq par kitna

ki wo ab bhi nigah wapsin malum hoti hai

ye ai sayyaad rah rah kar chamakti hai kahan bijli

jahan mera nasheman tha wahin malum hoti hai

lapak us ki chamak us ki wahi dam-KHam wahi aalam

ye bijli koi aah-e-atishin malum hoti hai

'riyaz' aisi mere dil se lagi hai jam-e-kausar ki

mai-e-angur ab achchhi nahin malum hoti hai