zamin nahin thi zamin par koi makan nahin tha

zamīñ nahīñ thī zamīñ par koī makāñ nahīñ thā

maiñ un dinoñ bhī kahīñ thā jab āsmāñ nahīñ thā

kuchh is liye bhī musāfir bhaTak nahīñ paa.e

ki un ke saath koī mīr-e-kārvāñ nahīñ thā

ajiib shor thā jo uTh rahā thā siine se

ajiib aag thī jis kā koī dhuāñ nahīñ thā

maiñ chāhtā huuñ jise vo bhī chāhtā hai mujhe

yaqīñ karo mujhe is baat kā gumāñ nahīñ thā

vo koī aur thā jo tum se baat kar rahā thā

vo lafz mere the lekin mirā bayāñ nahīñ thā

vagarna mujh ko bhī kachhve se maat ho jaatī

hazār shukr ki raste meñ sā.ebāñ nahīñ thā

bichhaḌte vaqt jo vāpas bulā rahā thā mujhe

vo mere lauT ke aane pe shādmāñ nahīñ thā

zamin nahin thi zamin par koi makan nahin tha

main un dinon bhi kahin tha jab aasman nahin tha

kuchh is liye bhi musafir bhaTak nahin pae

ki un ke sath koi mir-e-karwan nahin tha

ajib shor tha jo uTh raha tha sine se

ajib aag thi jis ka koi dhuan nahin tha

main chahta hun jise wo bhi chahta hai mujhe

yaqin karo mujhe is baat ka guman nahin tha

wo koi aur tha jo tum se baat kar raha tha

wo lafz mere the lekin mera bayan nahin tha

wagarna mujh ko bhi kachhwe se mat ho jati

hazar shukr ki raste mein saeban nahin tha

bichhaDte waqt jo wapas bula raha tha mujhe

wo mere lauT ke aane pe shadman nahin tha