zamin ne lafz ugaya nahin bahut din se

zamīñ ne lafz ugāyā nahīñ bahut din se

kuchh āsmāñ se bhī aayā nahīñ bahut din se

ye shahr vo hai ki koī ḳhushī to kyā detā

kisī ne dil bhī dukhāyā nahīñ bahut din se

ajiib log haiñ bas rāstoñ meñ milte haiñ

kisī ne ghar hī bulāyā nahīñ bahut din se

tujhe bhulānā to mumkin nahīñ magar yūñhī

tirā ḳhayāl hī aayā nahīñ bahut din se

namāz kaise paḌhūñ maiñ baġhair paak hue

ki āñsuoñ meñ nahāyā nahīñ bahut din se

ham apnī mamlikat-e-dard meñ akele haiñ

hamārī koī re.āyā nahīñ bahut din se

mufāhamat sī ajab ho ga.ī hai raat ke saath

charāġh maiñ ne jalāyā nahīñ bahut din se

zamin ne lafz ugaya nahin bahut din se

kuchh aasman se bhi aaya nahin bahut din se

ye shahr wo hai ki koi KHushi to kya deta

kisi ne dil bhi dukhaya nahin bahut din se

ajib log hain bas raston mein milte hain

kisi ne ghar hi bulaya nahin bahut din se

tujhe bhulana to mumkin nahin magar yunhi

tera KHayal hi aaya nahin bahut din se

namaz kaise paDhun main baghair pak hue

ki aansuon mein nahaya nahin bahut din se

hum apni mamlikat-e-dard mein akele hain

hamari koi reaya nahin bahut din se

mufahamat si ajab ho gai hai raat ke sath

charagh main ne jalaya nahin bahut din se