zamin par shor-e-mahshar roz o shab hota hi rahta hai

zamīñ par shor-e-mahshar roz o shab hotā hī rahtā hai

ham apne giit gaa.eñ ye to sab hotā hī rahtā hai

ye ham ne bhī sunā hai ālam-e-asbāb hai duniyā

yahāñ phir bhī bahut kuchh be-sabab hotā hī rahtā hai

tirī ḳhātir ka.ī sachchā.iyoñ se kaT ga.e rishte

mohabbat meñ to ye tark-e-nasab hotā hī rahtā hai

musāfir raat ko is dasht meñ bhī ruk hī jaate haiñ

hamāre dil meñ bhī jashn-e-tarab hotā hī rahtā hai

koī shai tasht meñ ham sar se kam qīmat nahīñ rakhte

so aksar ham se nazrāna talab hotā hī rahtā hai

zamin par shor-e-mahshar roz o shab hota hi rahta hai

hum apne git gaen ye to sab hota hi rahta hai

ye hum ne bhi suna hai aalam-e-asbab hai duniya

yahan phir bhi bahut kuchh be-sabab hota hi rahta hai

teri KHatir kai sachchaiyon se kaT gae rishte

mohabbat mein to ye tark-e-nasab hota hi rahta hai

musafir raat ko is dasht mein bhi ruk hi jate hain

hamare dil mein bhi jashn-e-tarab hota hi rahta hai

koi shai tasht mein hum sar se kam qimat nahin rakhte

so aksar hum se nazrana talab hota hi rahta hai