zamin pe baiTh ke be-iKHtiyar DhunDhta hun

zamīñ pe baiTh ke be-iḳhtiyār DhūñDhtā huuñ

maiñ āsmān kā gard-o-ġhubār DhūñDhtā huuñ

mujhe pata hai kisī meñ ye shai nahīñ maujūd

har ek shaḳhs meñ kyuuñ e'tibār DhūñDhtā huuñ

akelā baiTh ke masjid ke ek kone meñ

kamāl kartā huuñ parvardigār DhūñDhtā huuñ

ki aa.ine meñ ka.ī aa.ine kiye taḳhlīq

so ek chehre meñ chehre hazār DhūñDhtā huuñ

tumhārī yaad to rakkhī hai jeb meñ maiñ ne

ye kyuuñ idhar se udhar baar baar DhūñDhtā huuñ

maiñ aise 'ālam-e-vahshat meñ huuñ ki tanhā.ī

pukārtī hai mujhe maiñ pukār DhūñDhtā huuñ

mire liye to ḳhat-e-intizār khīñchtī hai

tire liye maiñ ḳhat-e-intizār DhūñDhtā huuñ

zamin pe baiTh ke be-iKHtiyar DhunDhta hun

main aasman ka gard-o-ghubar DhunDhta hun

mujhe pata hai kisi mein ye shai nahin maujud

har ek shaKHs mein kyun e'tibar DhunDhta hun

akela baiTh ke masjid ke ek kone mein

kamal karta hun parwardigar DhunDhta hun

ki aaine mein kai aaine kiye taKHliq

so ek chehre mein chehre hazar DhunDhta hun

tumhaari yaad to rakkhi hai jeb mein main ne

ye kyun idhar se udhar bar bar DhunDhta hun

main aise 'alam-e-wahshat mein hun ki tanhai

pukarti hai mujhe main pukar DhunDhta hun

mere liye to KHat-e-intizar khinchti hai

tere liye main KHat-e-intizar DhunDhta hun