zamin pe honge magar falak pe alam rahega

zamīñ pe hoñge magar falak pe alam rahegā

hamāre āñgan meñ panjatan kā karam rahegā

ḳhudā kī bāteñ kareñge vaa.iz par un ke dil meñ

qasam ḳhudā kī sukūñ kī ḳhātir sanam rahegā

nikal sakeñge jahāñ kī nazroñ se bach-bachā ke

tumhārā ġham apne ġham meñ jis darja zam rahegā

yazīdiyat kī to aal pā.egī lambī umreñ

husainī jo bhī hai shahr-e-kūfa meñ kam rahegā

koī bhī khānā ho achchhe bartan meñ pesh karnā

safed-poshī kā is adā se bharam rahegā

ham amn kī baat bhī kareñge magar hamārā

nishān voToñ meñ tiir talvār bam rahegā

tumhāre hone se ek had tak ḳhushī thī ham ko

tumhāre jaane se ek had tak hī ġham rahegā

jahāñ ke hālāt dekh kar lag rahā hai 'mūsā'

raheñge jab tak zamīn-zāde sitam rahegā

zamin pe honge magar falak pe alam rahega

hamare aangan mein panjatan ka karam rahega

KHuda ki baaten karenge waiz par un ke dil mein

qasam KHuda ki sukun ki KHatir sanam rahega

nikal sakenge jahan ki nazron se bach-bacha ke

tumhaara gham apne gham mein jis darja zam rahega

yazidiyat ki to aal paegi lambi umren

husaini jo bhi hai shahr-e-kufa mein kam rahega

koi bhi khana ho achchhe bartan mein pesh karna

safed-poshi ka is ada se bharam rahega

hum amn ki baat bhi karenge magar hamara

nishan woTon mein tir talwar bam rahega

tumhaare hone se ek had tak KHushi thi hum ko

tumhaare jaane se ek had tak hi gham rahega

jahan ke haalat dekh kar lag raha hai 'musa'

rahenge jab tak zamin-zade sitam rahega