zamin ruki hui hai aasman ruka hua hai

zamīñ rukī huī hai āsmāñ rukā huā hai

tumhāre baad hamārā jahāñ rukā huā hai

kahānī aur koī moḌ hī nahīñ letī

usī kā zikr sar-e-dāstāñ rukā huā hai

jo rāhbar the vahī rahzanoñ se mil ga.e haiñ

isī liye ye mirā kārvāñ rukā huā hai

jo da.avedār thā kal tak mirī mohabbat kā

vo tiir ban ke miyān-e-kamāñ rukā huā hai

ye merā qatl tirī be-ruḳhī ke baa.is hai

vo zahr to abhī zer-e-zabāñ rukā huā hai

vahīñ khaḌā huuñ jahāñ chhoḌ kar ga.e the mujhe

vahīñ pe sham.a vahīñ pe dhuāñ rukā huā hai

ye fāsla to kisī taur kam nahīñ hotā

jo tere aur mire darmiyāñ rukā huā hai

zamin ruki hui hai aasman ruka hua hai

tumhaare baad hamara jahan ruka hua hai

kahani aur koi moD hi nahin leti

usi ka zikr sar-e-dastan ruka hua hai

jo rahbar the wahi rahzanon se mil gae hain

isi liye ye mera karwan ruka hua hai

jo dawedar tha kal tak meri mohabbat ka

wo tir ban ke miyan-e-kaman ruka hua hai

ye mera qatl teri be-ruKHi ke bais hai

wo zahr to abhi zer-e-zaban ruka hua hai

wahin khaDa hun jahan chhoD kar gae the mujhe

wahin pe shama wahin pe dhuan ruka hua hai

ye fasla to kisi taur kam nahin hota

jo tere aur mere darmiyan ruka hua hai