zamin se aasman tak koi istiara nahin

zamīñ se āsmāñ tak koī isti.āra nahīñ

kisī ke ham nahīñ haiñ aur koī hamārā nahīñ

bhañvar-badan se kuchh is tarah ham ulajh baiThe

nikal ke jaa.eñ kidhar koī bhī kinārā nahīñ

usī ko ḳhvāb-e-havas meñ haiñ dekhtī āñkheñ

hamāre paas koī aur māh-pāra nahīñ

vo chāhtā hai ki ham dastaras meñ us kī raheñ

kisī kā ho ke raheñ ye use gavārā nahīñ

vajūd-e-jāñ ke sivā milkiyat nahīñ kuchh bhī

isī sabab se mirā koī goshvārā nahīñ

chalo ki karte haiñ taḳhlīq ik na.ī duniyā

koī nasīb kā apne yahāñ sitāra nahīñ

zamin se aasman tak koi istiara nahin

kisi ke hum nahin hain aur koi hamara nahin

bhanwar-badan se kuchh is tarah hum ulajh baiThe

nikal ke jaen kidhar koi bhi kinara nahin

usi ko KHwab-e-hawas mein hain dekhti aankhen

hamare pas koi aur mah-para nahin

wo chahta hai ki hum dastaras mein us ki rahen

kisi ka ho ke rahen ye use gawara nahin

wajud-e-jaan ke siwa milkiyat nahin kuchh bhi

isi sabab se mera koi goshwara nahin

chalo ki karte hain taKHliq ek nai duniya

koi nasib ka apne yahan sitara nahin