zan-e-hasin thi aur phul chun ke lati thi

zan-e-hasīn thī aur phuul chun ke laatī thī

maiñ she'r kahtā thā vo dāstāñ sunātī thī

ye phuul dekh rahe ho ye us kā lahja thā

ye jhiil dekh rahe ho yahāñ vo aatī thī

munāfiqoñ ko mirā naam zahr lagtā thā

vo jān-būjh ke ġhussa unheñ dilātī thī

'arab lahū thā ragoñ meñ badan sunahrā thā

vo muskurātī nahīñ thī diye jalātī thī

use kisī se mohabbat thī aur vo maiñ nahīñ thā

ye baat mujh se ziyāda use rulātī thī

maiñ us ke baa'd kabhī Thiik se nahīñ jaagā

vo mujh ko ḳhvāb nahīñ niiñd se jagātī thī

'alī' ye log tumheñ jānte nahīñ haiñ abhī

gale lagā ke mirā hausla baḌhātī thī

'alī' se duur raho log us se kahte the

vo merā sach hai bahut chīḳh kar batātī thī

maiñ kuchh batā nahīñ saktā vo merā kyā thī 'alī'

ki us ko dekh ke bas apnī yaad aatī thī

zan-e-hasin thi aur phul chun ke lati thi

main she'r kahta tha wo dastan sunati thi

ye phul dekh rahe ho ye us ka lahja tha

ye jhil dekh rahe ho yahan wo aati thi

munafiqon ko mera nam zahr lagta tha

wo jaan-bujh ke ghussa unhen dilati thi

'arab lahu tha ragon mein badan sunahra tha

wo muskuraati nahin thi diye jalati thi

use kisi se mohabbat thi aur wo main nahin tha

ye baat mujh se ziyaada use rulati thi

main us ke ba'd kabhi Thik se nahin jaga

wo mujh ko KHwab nahin nind se jagati thi

'ali' ye log tumhein jaante nahin hain abhi

gale laga ke mera hausla baDhati thi

'ali' se dur raho log us se kahte the

wo mera sach hai bahut chiKH kar batati thi

main kuchh bata nahin sakta wo mera kya thi 'ali'

ki us ko dekh ke bas apni yaad aati thi