zara andaz-e-qaza ab ke kaDa lagta hai

zarā andāz-e-qazā ab ke kaḌā lagtā hai

vo nayā yaar mirā shoḳh baḌā lagtā hai

kabhī hamdard kabhī dard-fazā lagtā hai

vo sitam-gar hai magar hosh-rubā lagtā hai

be-niyāzī to hai dastūr-e-hasīnāñ lekin

vo hasīñ ho ke hasīnoñ se judā lagtā hai

kabhī dīdār karā.e kabhī bāteñ kar le

kabhī guftār se ḳhud mujh pe fidā lagtā hai

kabhī paikān-e-nazar se mujhe ghāyal kar de

kabhī nazroñ se sarāpā-e-hayā lagtā hai

kabhī qurbān lage tarz-e-takallum se vo

kabhī maiñ baat karūñ to bhī ḳhafā lagtā hai

sabab-e-zulmat-e-dil bhī haiñ usī kī yādeñ

mire dil kā vahī zau-rez diyā lagtā hai

maiñ ne har baar mohabbat meñ jafā paa.ī hai

magar is baar vo pāband-e-vafā lagtā hai

ye mirī ḳhām-ḳhayālī hai haqīqat ye hai

vo bhī qātil hai faqat vaar nayā lagtā hai

yahī ab rāy-e-ḳhirad hai ki bhulā duuñ us ko

jo ki afkār-o-taḳhayyul meñ basā lagtā hai

vahī anjām huā jis se hirāsāñ thā dil

dil-e-majrūh kā har zaḳhm khulā lagtā hai

zara andaz-e-qaza ab ke kaDa lagta hai

wo naya yar mera shoKH baDa lagta hai

kabhi hamdard kabhi dard-faza lagta hai

wo sitam-gar hai magar hosh-ruba lagta hai

be-niyazi to hai dastur-e-hasinan lekin

wo hasin ho ke hasinon se juda lagta hai

kabhi didar karae kabhi baaten kar le

kabhi guftar se KHud mujh pe fida lagta hai

kabhi paikan-e-nazar se mujhe ghayal kar de

kabhi nazron se sarapa-e-haya lagta hai

kabhi qurban lage tarz-e-takallum se wo

kabhi main baat karun to bhi KHafa lagta hai

sabab-e-zulmat-e-dil bhi hain usi ki yaaden

mere dil ka wahi zau-rez diya lagta hai

main ne har bar mohabbat mein jafa pai hai

magar is bar wo paband-e-wafa lagta hai

ye meri KHam-KHayali hai haqiqat ye hai

wo bhi qatil hai faqat war naya lagta hai

yahi ab ray-e-KHirad hai ki bhula dun us ko

jo ki afkar-o-taKHayyul mein basa lagta hai

wahi anjam hua jis se hirasan tha dil

dil-e-majruh ka har zaKHm khula lagta hai