zara barish barasti hai shagufe jag uThte hain

zarā bārish barastī hai shagūfe jaag uThte haiñ

ka.ī rañgoñ kī ḳhushbū se darīche jaag uThte haiñ

abhī tak paañv kī aahaT se yā miTTī shanāsā hai

tumhāre saath chaltī huuñ to raste jaag uThte haiñ

kuchh aise raushnī dil meñ utartī hai qarīne se

bahut imkāñ tire va.adoñ ke sadqe jaag uThte haiñ

kabhī aise bhī hotā hai yūñhī baiThe biThā.e hī

mirī āñkhoñ meñ dariyāoñ ke dhāre jaag uThte haiñ

'samīna' maiñ to lafzoñ ko faqat likhtī huuñ kāġhaz par

to phir lafzoñ meñ ye kaise sharāre jaag uThte haiñ

zara barish barasti hai shagufe jag uThte hain

kai rangon ki KHushbu se dariche jag uThte hain

abhi tak panw ki aahaT se ya miTTi shanasa hai

tumhaare sath chalti hun to raste jag uThte hain

kuchh aise raushni dil mein utarti hai qarine se

bahut imkan tere wadon ke sadqe jag uThte hain

kabhi aise bhi hota hai yunhi baiThe biThae hi

meri aankhon mein dariyaon ke dhaare jag uThte hain

'samina' main to lafzon ko faqat likhti hun kaghaz par

to phir lafzon mein ye kaise sharare jag uThte hain