zara bhi jis ki wafa ka yaqin aaya hai

zarā bhī jis kī vafā kā yaqīn aayā hai

qasam ḳhudā kī usī se fareb khāyā hai

har ek kāfir-o-momin ke kaam aayā hai

vo har maqām jahāñ maiñ ne sar jhukāyā hai

bahut ġhurūr thā hosh-o-havās par lekin

nazar jab un se milī hai to hosh aayā hai

kabhī hujūm-e-alam meñ bhī muskurāyā huuñ

kabhī ḳhushī ke bhī aalam meñ jī bhar aayā hai

anīs-e-dard-e-judā.ī tirā karam bhī nahīñ

tirā sitam bhī to rah-rah ke yaad aayā hai

udaas dekh ke mujh ko udaas baiThe haiñ

tamām umr kā ġham aaj raas aayā hai

'shamīm' mauj o talātum se kyā gila kiije

safīna ain kināre pe Dagmagāyā hai

zara bhi jis ki wafa ka yaqin aaya hai

qasam KHuda ki usi se fareb khaya hai

har ek kafir-o-momin ke kaam aaya hai

wo har maqam jahan main ne sar jhukaya hai

bahut ghurur tha hosh-o-hawas par lekin

nazar jab un se mili hai to hosh aaya hai

kabhi hujum-e-alam mein bhi muskuraya hun

kabhi KHushi ke bhi aalam mein ji bhar aaya hai

anis-e-dard-e-judai tera karam bhi nahin

tera sitam bhi to rah-rah ke yaad aaya hai

udas dekh ke mujh ko udas baiThe hain

tamam umr ka gham aaj ras aaya hai

'shamim' mauj o talatum se kya gila kije

safina ain kinare pe Dagmagaya hai