zara si aas jagae zara umang bhare

zarā sī aas jagā.e zarā umang bhare

koī to aa.e mirī zindagī meñ rang bhare

mire laboñ pe ujāle koī tabassum phir

mirī nigāh meñ jalvoñ ke jal-tarang bhare

kabhī to yuuñ bhī mirī fikr kī satā.ish ho

mire ḳhayāl kī parchhā.iyoñ meñ ang bhare

koī to zaḳhm lagāte ki jān-bar kartā

ki tum ye tiir bhī le aa.e kaise zang bhare

na toḌ merī ḳhamoshī ki tujh ko zaḳhm mileñ

jo pur-sukūn haiñ dariyā vo haiñ nahañg bhare

dil-o-dimāġh kī in qurbatoñ se larzāñ huuñ

maiñ sochtā huuñ koī aa.e in meñ jang bhare

abhī jo so.e haiñ 'anvar' uTheñge hashr ke din

hameñ vo jaam pilā.e ga.e haiñ bhang bhare

zara si aas jagae zara umang bhare

koi to aae meri zindagi mein rang bhare

mere labon pe ujale koi tabassum phir

meri nigah mein jalwon ke jal-tarang bhare

kabhi to yun bhi meri fikr ki sataish ho

mere KHayal ki parchhaiyon mein ang bhare

koi to zaKHm lagate ki jaan-bar karta

ki tum ye tir bhi le aae kaise zang bhare

na toD meri KHamoshi ki tujh ko zaKHm milen

jo pur-sukun hain dariya wo hain nahang bhare

dil-o-dimagh ki in qurbaton se larzan hun

main sochta hun koi aae in mein jang bhare

abhi jo soe hain 'anwar' uThenge hashr ke din

hamein wo jam pilae gae hain bhang bhare