zara si bap mera kya zamin chhoD gaya

zarā sī baap mirā kyā zamīn chhoḌ gayā

haiñ saat bachche to azvāj tiin chhoḌ gayā

mujhe mile to maiñ us naujavāñ ko qatl karūñ

jo bad-zabāñ ke liye nāznīn chhoḌ gayā

rahā jo muft ye hujra diyā sajā ke use

makāñ kushāda thā lekin makīn chhoḌ gayā

pilāyā duudh bhī aur naaz bhī uThā.e magar

kamāl saañp thā jo āstīn chhoḌ gayā

palaT to jaanā hai ham sab ko ek din yaaro

magar vo shaḳhs jo yādeñ hasīn chhoḌ gayā

maiñ apnī talḳh-mizājī pe ḳhud huā hairāñ

gayā vo shaḳhs to lahja matīn chhoḌ gayā

abhī kī haq ne atā kī hai kal kī dekheñge

ab aisī bātoñ pe kaahe yaqīn chhoḌ gayā

vo ek jogī jo nāgin kī khoj meñ aayā

huā kuchh aisā ki vo apnī biin chhoḌ gayā

sila ḳhulūs-o-aqīdat kā maañg saktā thā

jo ek shaḳhs zamīñ par jabīn chhoḌ gayā

ḳhudā kā ḳhauf nahīñ virus kā thā ḳhadsha

jise bhī mauqa milā hai vo chiin chhoḌ gayā

koī maze se mirā khel dekhtā thā 'rashīd'

magar jo dekhne vaalā thā scene chhoḌ gayā

zara si bap mera kya zamin chhoD gaya

hain sat bachche to azwaj tin chhoD gaya

mujhe mile to main us naujawan ko qatl karun

jo bad-zaban ke liye naznin chhoD gaya

raha jo muft ye hujra diya saja ke use

makan kushada tha lekin makin chhoD gaya

pilaya dudh bhi aur naz bhi uThae magar

kamal sanp tha jo aastin chhoD gaya

palaT to jaana hai hum sab ko ek din yaro

magar wo shaKHs jo yaaden hasin chhoD gaya

main apni talKH-mizaji pe KHud hua hairan

gaya wo shaKHs to lahja matin chhoD gaya

abhi ki haq ne ata ki hai kal ki dekhenge

ab aisi baaton pe kahe yaqin chhoD gaya

wo ek jogi jo nagin ki khoj mein aaya

hua kuchh aisa ki wo apni bin chhoD gaya

sila KHulus-o-aqidat ka mang sakta tha

jo ek shaKHs zamin par jabin chhoD gaya

KHuda ka KHauf nahin wirus ka tha KHadsha

jise bhi mauqa mila hai wo chin chhoD gaya

koi maze se mera khel dekhta tha 'rashid'

magar jo dekhne wala tha scene chhoD gaya