zara si der ko aata hai lauT jata hai

zarā sī der ko aatā hai lauT jaatā hai

milan kī aas jagātā hai lauT jaatā hai

marīz-e-ishq ko de kar vo pyaar kā nusḳha

ḳhalish ko aur baḌhātā hai lauT jaatā hai

vo ek baar bhī suntā nahīñ mirī arzī

bas apnī baat sunātā hai lauT jaatā hai

jhagaḌ ke niiñd meñ aksar vo be-sabab mujh ko

darūn-e-ḳhvāb rulātā hai lauT jaatā hai

vo ishq ban ke utartā hai mere āñgan meñ

vafā ke diip jalātā hai lauT jaatā hai

dam-e-firāq vo letā hai pyaar kī qasmeñ

sunahre ḳhvāb dikhātā hai lauT jaatā hai

'zakī' ye kaun hai jo roz merī turbat par

yuuñ aa ke ashk bahātā hai lauT jaatā hai

zara si der ko aata hai lauT jata hai

milan ki aas jagata hai lauT jata hai

mariz-e-ishq ko de kar wo pyar ka nusKHa

KHalish ko aur baDhata hai lauT jata hai

wo ek bar bhi sunta nahin meri arzi

bas apni baat sunata hai lauT jata hai

jhagaD ke nind mein aksar wo be-sabab mujh ko

darun-e-KHwab rulata hai lauT jata hai

wo ishq ban ke utarta hai mere aangan mein

wafa ke dip jalata hai lauT jata hai

dam-e-firaq wo leta hai pyar ki qasmen

sunahre KHwab dikhata hai lauT jata hai

'zaki' ye kaun hai jo roz meri turbat par

yun aa ke ashk bahata hai lauT jata hai