zard patte the hamein aur kya kar jaana tha

zard patte the hameñ aur kyā kar jaanā thā

tez āñdhī thī muqābil so bikhar jaanā thā

vo na thā tark-e-ta.alluq pe pashemān to phir

tum ko bhī chāhiye ye thā ki mukar jaanā thā

kyuuñ bhalā kachche makānoñ kā tumheñ aayā ḳhayāl

tum to dariyā the tumheñ tez guzar jaanā thā

ishq meñ soch samajh kar nahīñ chalte sā.īñ

jis taraf us ne bulāyā thā udhar jaanā thā

tujh se hī TuuTā bharam rishtoñ kī mazbūtī kā

sar pe ilzām tire dīda-e-tar jaanā thā

ḳhud ko jab kar hī diyā thā tirī āñdhī ke supurd

phir ye kyā jaan ke karte ki kidhar jaanā thā

kyā ḳhabar thī ki yahāñ terī zarūrat hogī

ham ne to bas dar-o-dīvār ko ghar jaanā thā

zard patte the hamein aur kya kar jaana tha

tez aandhi thi muqabil so bikhar jaana tha

wo na tha tark-e-talluq pe pasheman to phir

tum ko bhi chahiye ye tha ki mukar jaana tha

kyun bhala kachche makanon ka tumhein aaya KHayal

tum to dariya the tumhein tez guzar jaana tha

ishq mein soch samajh kar nahin chalte sain

jis taraf us ne bulaya tha udhar jaana tha

tujh se hi TuTa bharam rishton ki mazbuti ka

sar pe ilzam tere dida-e-tar jaana tha

KHud ko jab kar hi diya tha teri aandhi ke supurd

phir ye kya jaan ke karte ki kidhar jaana tha

kya KHabar thi ki yahan teri zarurat hogi

hum ne to bas dar-o-diwar ko ghar jaana tha