zard patton ke tasawwur se Dari rahti hai

zard pattoñ ke tasavvur se Darī rahtī hai

dil ke gulshan meñ koī sabz parī rahtī hai

mausam-e-dard meñ har peḌ bikhar jaatā hai

ek ummīd kī vo shāḳh harī rahtī hai

vaqt kī dhuup tapish laakh ugā le dil par

ek goshe meñ magar thoḌī tarī rahtī hai

dil vo patthar hai jo har mauj sahā kartā hai

ġham vo naddī hai jo har vaqt bharī rahtī hai

fikr-e-mahbūb ġham-e-duniyā ḳhayāl-e-masjūd

be-ḳhudī aise masā.il se barī rahtī hai

TūTtā rahtā hai kamre meñ añdherā 'shāhid'

dhuup dīvār ke us paar dharī rahtī hai

zard patton ke tasawwur se Dari rahti hai

dil ke gulshan mein koi sabz pari rahti hai

mausam-e-dard mein har peD bikhar jata hai

ek ummid ki wo shaKH hari rahti hai

waqt ki dhup tapish lakh uga le dil par

ek goshe mein magar thoDi tari rahti hai

dil wo patthar hai jo har mauj saha karta hai

gham wo naddi hai jo har waqt bhari rahti hai

fikr-e-mahbub gham-e-duniya KHayal-e-masjud

be-KHudi aise masail se bari rahti hai

TuTta rahta hai kamre mein andhera 'shahid'

dhup diwar ke us par dhari rahti hai