zarf us ka meri ummid se baDh kar nikla

zarf us kā mirī ummīd se baḌh kar niklā

maiñ ne dariyā jise samjhā vo samundar niklā

maiñ jise dhuup samajh kar kabhī ghabrātī thī

vo mere apne ḳhayālāt kā manzar niklā

ham ne jaanā thā jise saarī duniyā se alag

vo bhī duniyā ke rivājoñ hī kā ḳhūgar niklā

kho diyā jab to ehsās huā shiddat se

maiñ jise ḳhaar samajhtī thī gul-e-tar niklā

apne jazbāt ko is tarah se mahsūs kiyā

dil kā ik lafz kabhī bhī na zabān par niklā

kuchh fanā bhī na miTā paa.ī mohabbat kā vajūd

ā.īna TuuT ke kuchh aur bikhar kar niklā

'nāz' ḳhushbū mujhe har or se mahsūs huī

is chaman-zār kā har phuul mo.attar niklā

zarf us ka meri ummid se baDh kar nikla

main ne dariya jise samjha wo samundar nikla

main jise dhup samajh kar kabhi ghabraati thi

wo mere apne KHayalat ka manzar nikla

hum ne jaana tha jise sari duniya se alag

wo bhi duniya ke riwajon hi ka KHugar nikla

kho diya jab to ehsas hua shiddat se

main jise KHar samajhti thi gul-e-tar nikla

apne jazbaat ko is tarah se mahsus kiya

dil ka ek lafz kabhi bhi na zaban par nikla

kuchh fana bhi na miTa pai mohabbat ka wajud

aaina TuT ke kuchh aur bikhar kar nikla

'naz' KHushbu mujhe har or se mahsus hui

is chaman-zar ka har phul moattar nikla